السلام عليكم ورحمه الله وبركاته
لو سمحتم محتاج نصيحه صادقه تفيدني وتفيد اي حد يمكن يكون بيمر بنفس الاحساس اللي انا فيه حاليا ..
انا عملت اشياء فظيعه في الفتره اللي فاتت من حياتي وانا معترف اني كنت غلطان ومستعد ارمي كل حاجه وراء ضهري وابدأ كانسان جديد يعمل كل حاجه كويسه باذن الله ..
بس المشكله عندي في حاجتين ..
الاولي / علي طول بيتردد في دماغي ان اللي انا عملته في الماضي هينكشف وهعيش ازاي وسط الناس تاني .. واني هفضل كدا طول عمري مهما حاولت اتغير والي اخره من وساوس داخليه بتحبطني من الداخل
الثانيه / وهي نتيجه للاولي اني لو حتي نجحت اني اتغير وكل شئ بقي تمام .. حاجه من الحجات الغلط دي هتنكشف وساعتها كل اللي عملته هيروح وبيجي في راسي دايما الناس اللي بحبهم لما يعرفو عني كدا هيبقي نظرتهم ليا ازاي
المشكلتين دول نتايجهم عليا مدمره .. زي الاحباط من عمل اي تقدم .. الحزن والضيق لما بتاعمل مع اي شخص .. اني تايه ومش حاسس بأي شئ حوليا وغيرها من النتايج مش فاكرها ..
و الشئ اللي مخليني اكتب الموضوع دا هنا اني حاسس جوايا بضوء بسيط اوي بيقولي ان دي مجرد وساوس وتضخيم للامور وان تفكيري كدا غلط تماما .. بس في نفس الوقت مش عارف اطرد الافكار دي وابدأ دنيا جديده ..
ربنا يكرمكم محتاج نصائح تفيدني اني امر من المرحله دي علي خير
وشـكرا علي وقت حضـراتكمـ
