اصبحنا واصبح الملك لله رب العالمين كلمات ايمانية تنطلق بعفوية وصدق طوية من حنجرة صديقنا الستيني ابو صويلح ... ياصالحة وين امك اليوم عسى ماشر مخليتني لهالوقت نايم ماهي بعادتها .. تلبي صالحة النداء وهي تقول صبحك الله بالخير يابوي ..امي راحت مع السواق هي وصديقتها ام فنونه يحضرن اجتماع بالحارة بمناسبة عيد الام .. يقولون ان فيه جوائز للام المثالية ومثلك يعرف ان ام صويلح تنافس على هالجائزة مع صديقة طفولتها ام فنونة .. وين امك والمثالية الظاهر ماخذين فيها مقلب توها اركدت هي وصديقة الكراث والجرجير الله يرحم ايام السطح متبطحات بهالشرقه وهاك يالف بهالكراث وحش منظم يتخلله بعض الاستغفار ,و قولة ( الله يكفينا غرتها ياوخيه ) وهن صالخاتها حتى العظم ... وين الشاي جيبيه لي عند النخل ... اصبر يابوي امي تقول انها جايه هالحين لعلها تسوي لك شاهيك انا ما اعرف المقادير ... هاذي الام المثالية ليه ماعلمتك مانتي بكرة تبي تروحين لبيت زوجك والا تبي تروح امك المثالية معك .. يابيي امي ماهي مقصره بس تقول ابوكم من تخصصي .. ليه انا عندكم اعداد عام ...واثناء النقاش قُرع الجرس ... هذه امي لعلها تفكني من عتابك اليوم ... شكلك يابوي مو رايق اظن شاي امي فيه سر هدوءك اليومي .. تدخل ام صويلح وهي تلوح بالجائزة وتمر ابو صويلح بسرعة وهي تقول ( ولكم welcamابوصويلح) اتمنى ان تقتدي بي لتستحق جائزة الشايب المثالي ... عطني دقيقتين ابدل ملابسي وبسويلك الشاي اللي تحب واطلعك على جائزة الام المثالية لعام 2006م اللي اخذتها بجدارة انا وام فنونة... هنا يزمجر فتى منفوحه اقول لايكثر ... وبعد انتقال فتانا لمجلسه اليومي تاتي ام صويلح في موعدها وبعد كاسة النعناع الاولى والثانية تهدء اعصاب الستيني الثائر فتطلعه على وسام الام المثالية كجائزة مستحقة .. هنا يقول ابوصويلح يام صويلح انا ماانكر دور الام في التربية والفضل فديننا حث عليه واعد الله لمن ادى حقها وبرها الاجر العظيم ويسر له التوفيق في الدارين وانت تعرفين الحديث اللي اوصى بها...فهل كل ام مثالية ..بالطبع لا ...اذا ماهو باعتقادك دور الام المثالية في المجتمع.. يابوصويلح بحكم اني وام فنونة ممن يشار لهن بالبنان بالحارة كامهات مثاليات يسعدني ان اوضح لك دورهن الذي غفل عن امثالك محاربي التحرر .. اعتقد اولا الاعداد الايماني والروحي والاجتماعي والثقافي والنفسي للابناء ليدخلوا معترك الحياة ويفوزوا بالدنيا والاخرة ....تكفين يام صويلح :roll: :roll: :roll: .. اعرف والله وين يتم الاعداد في ذاك السطيح انت وصديقتك مع تخصيب الكراث ..( كلمات جارحة من ابو صويلح تنم عن ردت فعل عن فشله في حصوله على الشويب المثالي بالحارة .. لاتلومونه مافي جائزة ولا شويهي ...) انا موقنه انك اليوم ضغطك مرتفع بس ارجو ان تزور التختر ابو ربيع لعله يلقالك علاج .. بس هذا لن يقلل من امكانياتي وثقتي بنفسي ...هذا انتم يارجاجيل اذا تفوقنا عليكم حاولتم تقصصونا ...قطيعه تقطعكم ( كلمة شجب واستنكار نسائي ) :oops: :oops: :oops: .. ماتدري وش قالت اليوم رئيسة الجائزة ام كلوه اليوم ..هنا ياطعها ابو صويلح : ادري ماعندها الا الهذره انا اعرف زوجها ابوكلوه مذينا له سنه ياناس التقنية والحكومة الالكترونية واثره ماعنده الا بلايستيشن وبعد دايم فايزين عليه ورعانه ويكشخ علينا كمبيوتري المحمول واكتشفنا انها شنطة علاجات ومواس حلاقة... تحاول المثالية تهدئته ... ياعزيزي الله يسامحك ترى بعض الحريم افهم من رجالهن ... المهم عطينا وش تقول هالريسه .. تقول ياالمنحر ( أي ياللي مرتفع ضغطه ) الاشخاص الذين وصلوا الى ذروة النجاح ( مثلي ) في حياتهم المهنية يذكرون ان الوصول الى اهدافهم في العمل يزيد التزامهم تجاه حياتهم العائليه لانهم يشعرون بقدر هائل من الامان وهو الامر الذي يجعل وقتهم خارج العمل اكثر كفاءة ... لذا ياشويبي العزيز لكي نحث ابنائنا على النجاح المثالي لابد ان نوفر لهم الامان العائلي الذي يستنبت الثقة وحب العمل والاخلاص فيه ويبثها في نفوسهم منذ نعومة اظفارهم فالتغيير الايجابي في حياتنا لن ينتهي اليوم ولكنه يمكن ان يبدأ اليوم ... هنا لم يمتلك ابوصويلح الا ان يبتسم ابتسامة اعجاب :lol: :lol: :lol: ترافقها الفتحة المعهودة في الواجهة الامامية لاسنانه التي اتلفها لف الحلويات ويقول ( نعم انا مع كل ماقلته سابقا واقدم اعتذاري لكي ولصويحباتك والى رئيسة الجائزة عما بدر من تهكم واتمنى ان تكون هناك جائزة الاب المثالي على غرار جائزتكن وتوضع لها شروط ومعايير مع علمي بان اصدقائي ابو كبد وابو فنونه سيحصلون على جائزة الدواج المثالي ... هنا يخيم الحبور على جلسة الضحى ويكون للفستق الحلبي طعم اخر.. ودمتم سالمين .. عقد السلسبيل