[align=justify:2cc5460d81]صويلح ...صويلح ...صويلح ...قم ياوليدي راحت عليك المدرسة ... قم تراني مسوية لك فطور الشكشوكة اللي تحبها يانظر عيني ... خليني ماني قايم ..مابي ادرس ابي افصل ... يستيقظ ابو صويلح على الهرج والمرج اللذي يدور بين صويلح وامه ... ياصباح الله خير وش هالازعاج ماهي عوايدك يام صويلح ... صويلح مايبي يروح للمدرسة ويقول ماني دارس ويبي يفصل .. وازيدك من الشعر بيت له يومين او ثلاثة متغير علينا بس صاك على نفسة في ذا الغرفة ونفسه عند راس خشمة ومتلطم وتعرف هو بسم الله عليه ( مودرن ) يحب التقليعات والصيحات الجديدة واشوفة صاك هاللطمة حسبت ان موضة هالسنة التليطمه ... خليه ينام لين الضحى ولاسويتي شاي الضحى وحطيتيه عند النخل ناديه يتقهوى هو ووخيته صالحة ..وفي مجلس الضحى اجتمع الكونسلتو لدراسة القضية بقيادة الزعيم وعضوية ام صويلح وصالحة خريجة ثالث ثانوي منازل وبحضور المكتئب صويلح ... ياوليدي وشفيك ضايق صدرك ومانت رايح للمدرسة عسى ماشر ترانا نرجي الله ثم نرجيك في الدنيا وانا ابوك ( كلمات ابوية حانية ) ... بصراحة يابوي انا كرهت كل شي حياتي ومدرستي وحتى اني حاولت الانتحار بس ماقدرت .. اعوذ بالله .. فيقطع الحوار ولولة ام صويلح وصوت دوي صادر من ضربها على صدرها دون شعور هلعا مما سمعت ... ذلك الدوي صوت ارعب صالحة التي احرقت بريطماتها كاسة الشاي عندما ( نقزت كردة فعل لاشعورية لصوت ضربة الصدر ) يمه وش فيك فجعتيني .. بسم الله عليك يابنيتي ... يابوصويلح اظن هالوليد المقرود صاكته عين ماصلت على النبي لازم نوديه لوحدة يقولون انها توسد ويدها مبروكه وما تاخذ الا عشرة ترى ان تاخرنا اخاف انه ينسم ومانلحق عليه...يمه الله يهديك شايفتني كفر ...يعترض الزعيم وش ( توسد ومبروكه ) يابنت الحلال هاذي دجالة واظنها تطلب منك اسم امه وتامر بذبح تيس اسود دون تسميه وغيرها من الامور الشركية الخطيرة على عقيدة المسلم ماسمعتي قوله تعالى ( ان الله لايغفر ان يشرك به ويغفر مادون ذلك لمن يشاء ) .. ليتنا نحرص على الرقيه الشرعية التي شرعها لنا الدين ونحرص على محاربة من يدعي البركة ويامر بالشرك وترى اصل الرقية ان يرقي المسلم نفسه فهو اصدق من يلتجىء الى الله واحوج مايكون لعونه والحاحه بالدعاء والتضرع لربه سيكون فرجه باذن الله فصاحب الحاجة لحوح ....
ياوليدي انا عارف سبب هالضيقة وهذه الكابه .. ياوليدي لك فترة ماشوفك تصلي مع الجماعة ولاتحرص على اذكار الصباح والمساء والباقي انت اعرف مني فيه ...تقاطع كالعادة ام صويلح الحوار دون اسئذان حالها حال بعض شبابنا هداهم الله عند الاشارات المرورية ( هذا مربط الفرس ) عبارة تنم عن اصابة الهدف ... ياجنيني البعيد عن ربه بعيد عن الناس ويسوقه الوسواس الخناس ... يمه وش هالمصطلحات ( منسم ويسوقه ) اظن جدي كان بنشرجي وانا مدري .. اسكتي بس انت مانتي جيدة الا بالطنازه ياصالحة... فيتابع صاحبنا حديثة مع حنق بدرجة متوسطة على مقاطعات ( سفيرة النوايا الحسنة ) .. يام صويلح اللي قلتيه صحيح وفي ذلك يقول جل وعلى ( ومن يعش عن ذكر الرحمن نقيض له شيطان فهو له قرين ) ويقول تعالى ( الا بذكر الله تطمئن القلوب ) ... ويااسرتي العزيزه ابي انصحكم ونفسي واخص صويلح باللي نصحنا به العالمون الذين سبروا اغوار الحكمة والمعرفة فقالوا :
اياك والذنوب فانها مصدر الهموم وبوابة المصائب والاحزان ... واكثر من الاستغفار فهو رفيق الخير والرزق والسعادة والفرج ... وعليك بالصدقة فانها تطفىء الخطيئة وتذهب الهم وتزيد الرزق ... وزر المستشفيات والسجون ودار المعاقين ودور الملاحظة لتعلم مقدار نعمة الله عليك وفضله ... وانظر دائما للجوانب المشرقة من المصائب واعلم ان ما اصابك لم يكن ليخطئك وما اخطئك لم يكن ليصيبك فمن رضي فله الرضى ومن سخط فله السخط ...لاتياس من روح الله ولاتقنط من رحمته واكثر من الدعاء فلا راد للبلاء الا الدعاء ... هنا تبدو الراحة النفسية على صويلح ليردد صدقت يابوي .. صدقت يابوي ... اعدك اني سالتزم ماتقول واعتصم بحبل الله المتين وساحافظ على ماذكرت من اليوم ... وفي هذه اللحظة الدرامية (تعيط ) ام صويلح فرحا لرجوع ابنها وانشراح صدره فتضمه وهي تدعو له بالحفظ والصلاح ... فتغار خريجة الثالث ثانوي منازل فتقول ( نحن هنا ... عطينا شوي من الحنان يام صويلح ) فتداعبها الحنون بكوع جانبي مفعم بالحب تتقبله البنت الباره بالترحاب وبضحكة جميلة يتبعها انطلاقة سريعة كانطلاقة المصارع سنوكا على راس الام الرؤوم لتقبيله والاعتراف بفضل من امرها الله ببرها ودعاها له واعاننها عليه.
ودمتم سالمين عقد السلسبيل[/align:2cc5460d81]

رائـــــعه

بالفعل اعجبتني

عقد السلسبيل

اسلوب مشوق ومهارة في السرد

والاهم من ذلك الفائدة المرجوة

تحــياتي

أخي عقد السبيل ..أنت مدمن نصائح :lol: ..والله ماأدري وش أبدي ..

المهم تابع فنحن نتابع .... :wink:





ــــــــــــــــــــــ

اختي الخبيرة اشكر هذا الاطراء من كاتبة لها بصمتها في الموقع وامل ان تكون الرسالة وصلت والفائدة وتحققت والله من وراء القصد .
اخي اليوم الاول اتمنى ان تستجيب للنصيحة التي ترى انها تحقق اهدافك في الدنيا والاخرة وحتى يكون اليوم الاخير يوم فرح وحبور وسعد بمقابلة الديان ويسعدني مروركما ودمتم سالمين اخوكم عقد السلسبيل

أمام هذا الطرح الرائع لا نستطيع إلا أن نقف


وقوف المتأمل المعجب


نقرأ وندخل عوالم مختلفه من المرح والتعليم والجد والهزل


تتحقق بها الفائدة ويحصل بها المقصود بأبسط الكلمات وسلاسة الطرح



دمت بود ولك مني كل الحب


أخوك / البـــــــــارع