السلام عليكم ورحمة الله وبركاته..
عندي 7 أخوان منهم متزوجين ومنهم لا ..
وابوي متوفي..
الحمد لله اخواني الخمسه الكبار صالحين وناجحين في كل شي والحمد لله من الناحية العلم والعمل ..
و الثنين من اخواني واحد عمره 17 سنه واحد عمره 11 سنه ..
والي في سن ال17 سنه هو ( المشكله الي ما لقينا لها حل)..

أنا واخواني وأخواتي وامي نهتم فيه كثير ونحبه ونخاف عليه بس اهو الله يهديه احس انه ما يحس بها الشي ..
نوفره كل شي علشان ما يحس انه نقصر معاه باي شي من فلوس وطلعات مع اصحابه وتوفير له سياره ويتعاملون معاه على انه كبير وصاحب مسؤؤلية ويقدرونه ويحترمون اي شي يقوله ..يجتمعون اخواني كثير وفي كل جمعه يحبون انه يكون موجود معهم علشان يحسون فيه ويحس فيهم ويخلونه يماشي بس عيال3 من اخوالي وولد خالتي (الي في سنه)..في هذي الفتره ما كان يبين عليه الا اشياء بسيطه من الحركات الي ما هي زينه..

وكل بعد فتره وفتره يزيد بشكل سريع حتى صار أنه يكذب كثير وما نقدر ناخذ منه اي كلام وحركاته غريبه ويقلد الشباب الفاسدين ويسوي اشياء ماهي في سنه حتى النظافه ما يهتم فيها ابد ( الله يكرمكم) ما يدخل الحمام الا بالقوه وكم مره اخواني يمسكونه وهو يدخن أو ريحته دخان ويفحط بالسياره في الشوارع ويشوف اشرطة فديو وسخه حتى مره أعتدى على وحده من شغالات البيت وصار يرد على امي كثير ويزعلها ويرفع ضغطها أذا ما في احد عنده من اخواني (مع انه ما قد احد من اخواني رفع صوته على امي أو زعلها )..

طبعا بعد هذا كله غيرنا معاملتنا معاه وقاموا اخواني بطرق يحاولون يصلحونه قاموا بمراقبته مع مين يمشي بالضبط واكتشفوا ان عيال اخوالي وخالتي نفسهم هم حركاتهم ماهي زينه(طبها هذي مشكله كبيرة لانهم أقاربنا وكيف نبعدهم منه)ولمن يمسكونه على شي كم مره ينصحونه ويكلمونه على انه رجال ولازم ينتبه وكم مره يخاصمونه ويحرمونه من اشياء هو يبغاها وكم مره حبسوه في البيت لفتره طويله علشان ما يلجأون للضرب معاه على طول بس ما في فايده حتى وصلوا انه يضربونه يمكن يحس اشوي بس برضه ما في فايده ورجعوا مره ثانيه على المسايسه معاه وعلى هذا الحال مره كذا ومره كذا ..

في نهاية السنه الدراسيه توقعوا اخواني وامي انه بيرسب في هذي السنه لان أبدا ما يهتم في الدراسه ..بس الي فاجأهم ان جايب الشهادة وهو ناجح في هذي اللحظه الكل فرح واخواني الي كافئه واعطاه فلوس والي خلاه يسافر مع اصحابه لمنطقة قريبه لمدة ايام ويالله فرحة البيت ما تتصور في هذا اليوم حتى الي كان مسافر من اخواني يتصل عليه خصيصا ويباركله(ما صدقوا لقوا شي فيه زين)..
وبعد ما خلصت العطله وبدت الدراسه الجديده طبع هو صار يداوم. بعد ايام قليليه(بعد اسبوع تقريبا من الدراسه) اتصلوا اخواني علشان يطمئنون عليه ويسألون عنه هل يداوم ولا لأ اكتشفوا ان راسب في السنه الي راحت وجايبلهم شهادة مزوره في هذي اللحظه كل اخواني تجمعوا في البيت ينتظرونه الي ماسكله عصا ولي واقفله في الشارع وامي تعبت في هذي اللحظه ولمن دخل البيت خاصموه وضربوه وطاحت امي مغمى عليها وبكى اخوي كثير وتاثر بالي صار في امي وقال والله ما أعيدها حتى قالهم(انا استاهل ما يجيني اضربوني والله انا استاهل ) وحبسوه لمدة شهر تقريبا في الغرفة وشهر ثاني في داخل البيت بس .وتغيرت حركاته وصار هادي كثير وقل كذبه وقلنا الحمد لله الولد تغير كثير وعطوه المجال انه ينزل بس بشروط وصار يسوي الي يقولوله اخواني بس مع الايام صار يبين الزين قدام اخواني ومن وراهم رجع اخس من الاول حتى مره ثانية زور الشهادة..

صاروا اخواني محتارين معاه وصلوا الى درجة اليأس من صلاحه..
لان تقريبا كل الطرق حاولوا معاه وفي طرق كثيره انا ما ذكرتها من كثرها.


اتمنى انكم تساعدونا في هذي المشكله الي مأزمه الكل.

انا كتبت الموضوع في قسم علم النفس الاجتماعي وكتبته هنا ايضا لكي احصل على رد سريع..(لأهمية الموضوع)...

وأكون شاكرة لكم جزيل الشكر.

السلام عليكم ورحمة الله وبركاته...

انا راسلت كثير من الدكاترة الي في هذا المنتدى والى الان ما حصلت على رد واحد منهم ...

فضطريت اني اكتبها في اقسام المنتدى ..

فحصلت على رد سريع من الاخو المسلم الايجابي ..ففرحت كثير وحسيت ان في امل اني الاقي حل.....وانتظرت الرد الثاني وحسيته اتأخر ..
هل يا ترى يا أخي مالقيت حل؟؟؟؟؟؟؟؟

يا أخوان و يا أخوات ايش السالفة ..ليش ما تردون علي ...هل صحيح المشكله هذي ما لها حل ........

وأسمحولي على الازعاج.

أختي الحبيبة ...مافي مشكلة مالها حل واعذرينا ان تأخرنا بالرد
إن شاء الله الاخصائين مابيقصروا معك وبيساعدوك بس اصبري عليهم شوي
اكثري الدعاء لأخوك خصوصا بآخر الليل وفي السجود فإن له مفعول عجيب وتيقني من الإجابة وإن تأخرت
قومي.. وأحسني الظن بربكِ.. وتحنني إليه بجميل أوصافه.. وسعة رحمته.. وجميل عفوه.. وعظيم عطفه ورأفته.. فحاجتكِ ستقضى.. وكربكِ سيزول.. وليلك سيفجر.. فلا تيأسي واطلبي في محاريب القيام الفرج!
فعن أبي هريرة رضي الله عنه أنَّ رسول الله صلى الله عليه وسلم قال: "ينزل ربنا تبارك وتعالى كل ليلة إلى السماء الدنيا، حين يبقى ثلث الليل الآخر فيقول: من يدعوني فأستجيب له، من يسألني فأعطيه، من يستغفرني فأغفر له" (رواه البخاري ومسلم).
سهام الليل لا تخطيء ولكن.....لها أمـــد وللأمـــد انقضاء
أسأل الله أن يهدي أخوك ويصلحه فيكون لكم مثل ماتتمنون وأحسن ...

................

أختي الرائعة والإيجابية

كوني متفائلة إذا أردت حل أي مشكلة


أهنيء المنتدى بانضمام إيجابية تحمل الهم وتسعى في مداواته


أختي المباركة

كما توقعت وقع وهو أن كثير من الأسر عندما ترى ابنها مطاوعا في لحظة

عمره من الطفولة إلى ما قبل البلوغ , أنه لا يحتاج إلى متابعة وتوجيه

والصحيح بأنه بأمس الحاجة لذلك مع أخذ بالحسبان الأسلوب الأمثل في ذلك

التوجيه . في الغالب أنه مجامل غير معبر وفي هذه المرحلة يعوض ما كان يكتم من مشاعره .

أو أن أخيكم كان دائما محدود العلاقة كثير البقاء في البيت , وعند أخذه للسيارة فتحت له أبواب مغلقة جميعها مرة واحدة فانساق لإغراءتها


وأذكر أن طالبا حضر لي دورة في المذاكرة وفي الاستراحة سألني عن

نفسه أنه كان مهتم ومنظم وجيد في الدراسة وما أدري لماذا تغير كل هذا

قلت له متى اشتريت السيارة ؟
ثم سألته قبل ماذا كان برنامجك فاستغرب السؤالين ؟


بعدها أخبرته لماذا هو الآن هكذا .



هذه نقاط أرجو أن تفيدكم :

1 / حالة أخيكم الأصل أنها طبيعية كنتيجة تعامل معه وما هو فيه الآن , نتيجة لتراكمات سابقة , هذا ليس تثبيطا بل لأجل أن نضع المشكلة بحجمها الطبيعي . حتى نتحرر من الضغط النفسي .


2 / الدعاء بقلب صادق موقن بفرج ربه غير مستعجل , بأن :
يهدي أخيك .
أن يرزقك الأسلوب الأمثل في تربيته
أن يبارك بالأسباب التي تبذلونها .
أن يحبب لقلبه الخير ويكره الشر


3 / ضعوا هدفكم بعيد المدى . كيف ؟
يعني نريده أن يتغير في لحظة وهذا ما لا يمكن إلا أن يشاء الله
مثلا أريده أن يتغير بعد ثلاث شهور أو أربعة أو خمسة ؟

فهذا يفك مني الشد العصبي والانفعال اللإرادي , والتخبط في الحلول

4 / التركيز على الجهد لا النتيجة

مثال طالب مخفق أتى بمعدل ضعيف . بدأ يحاول محاولات بسيطة

جاب معدل مقبول . نركز هنا على جهده ماشاء الله فيه تحسن وبإذن الله

راح تجيب المرة الجاية أفضل , يا أخي ما شاء الله الشيء إذا حطيته براسك

تبدع فيه .

هنا أثنيت عليه وحفزته وحسسته أنه في شيء تغيير .

والتغييرات البسيطة على المدى البعيد تصبح تغييرات كبيرة


5 / استخدموا شعرة معاوية معه .

لا تكونوا كلكم معه أو ضده

فاتفقوا أن يكون أحد إخوته الأقرب لنفسه , المدافع عنه دائما

وهو فيما بينه وبينه يوجهه .

وهذه طريقة غير مباشرة في كسبه


6 / لا تشعروه بضعفكم قدامه وعجزه عنكم .


أنصح بسماع شريط

أساليب عملية في التعامل مع المراهقين

أ. هاني عبدالقادر

السلام عليكم ورحمة الله وبركاته ....

اشكرك اخي soso.على ردك لي وسأبذل جهدي ان شاء الله في ما قلته .......وادعوا الله ان يكون في ميزان اعملك..

اشكرك اخي المسلم الايجابي مرة اخرى .......
ردك لي عما ذكرته من نقاط يشعرني اني استطيع ان افهم المشكلة اكثر ..وانا أتفق معاك في ذلك وسأقوم ان شاء الله انا واخواني بذلك .

ولكن انا أرى من ناحيتي ان سبب المشكله هم الي يماشيهم من شباب(والمشكله انهم اقاربنا)..حاولنا ان نلمح لاهليهم على ان نحن نتبه لعيالنا بس ما في فايدة الا أهل واحد من الشباب ..

فياريت اذا ما اثقلت عليك انك تعطيني رأيك في هذا الموضوع...

وياريت من الاخوه والاخوات أيضا يعطونا رأيهم في هذا الموضوع..

وأشكركم جزيل الشكر.

أختي الإيجابية


بإمكانك أن تشتغلوا على خطين

بالاتفاق بين أحد إخوتك وولي ابناء الخوال


في كيفية الإصلاح



ولكن أنتم عليكم بأخيكم ولا تستسلموا للأوهام فقلب أخيك بيد ربك

ابذلوا ما بوسعكم


وإذا كنتم في الرياض فلا بأس بمقابلت أحد إخوتك الكبار


ولا تنسي الشريط هذا رد على عجل ولعله تكون هناك رجعة بإذن الله

اخي المسلم الايجابي..بصراحة ما أعرف كيف اشكرك على أهتمامك بموضوعي..

ولي أفرحني كثير انك عندك أستعداد تقابل أحد أخواني الكبار لحل المشكله.. والله ما أعرف كيف أشكرك فعلا..جعلها الله في ميزان حسناتك يارب.

انا ما عندي مانع انك تقابل احد أخواني ...بس عطني مهله آخذ الاستأذان منهم ..وأردلك خبر بكره ان شاء الله ..

أشكرك جزيل الشكر.