اعاني من الرهاب من فتره طويله مره يجي ومره يروح ......الله يسامح الوالد والدبغ اللي كان يجيني من اتفه الاسباب :)

حتى اذا كبيت كاسة مويه بالغلط كنت انجلد ...مأساه يوميه لابد منها ..... يعني هو ذنبي اني اعاني من الرهاب ؟

اذا عندك رهاب انت فاشل؟ اكيد لا ....اذا كان شي فاشل فهو البيئه اللي تربيت فيها ....لكن اقهر الاسباب ولا تنظر الى النتائج

لكن جرب اللي تحت و ما بتخسر شي

1- الصلاه والذكر والقران

2- اذا لازم تروح عندك شغله لا تفكر اش اللي بيصير ولاتقول انك بتخاف روووووووح والله معك واذكر الله ولا تهتم اذا حسيت برعشه خفيفه او تعرق اعتبره نشاط زائد او عصبيه (اللي يعصبون تلقاهم دايم ينتفضون) بالعكس استغل هذا الشي في مصلحتك ....اذا مرتبك لاتكبت نفسك ارفع صوتك وطلع النرفزه على اللي حولك لان هذا يدعمك نفسيا حتى لو شي تافه

3-اللي مايعجبك لاتسويه ابد

4-اللي يعجبك سوه كل يوم

5- تعلم فنون التصريف علشان اذا مسكتك الحاله تعرف تصرف اللي حولك وتنسحب بهدوء وبأقل الخسائر المعنويه في اصعب الظروف الاجتماعيه

6-لاتكبت العصبيه اللي ممكن تجيك استغلها علشان تخلص اشغالك او تمرن علشان تطلع

7-خلك على مبدأ ""بايعها بتراب"" ولاتفكر في اللي حصل

8-لاتقول في نفسك انك اقل من الاخرين بالعكس (انا في رأيي الشخصي حنا اقوى الناس لان غيرنا يمكن ينتحر)

9-الناس اللي حولك ماينتبهون للقلق اللي يجيك لما تقابلهم ما ينتبهون له الا بعد ما تطيح في الدوامه وتقول في نفسك انا مرتبك اكيد الناس يدرووون ثم تتأزم الحاله

10- لاتستسلم ابد

11-خل وجهك صبه يعني بمفهومنا حنا اللي عندنا رهاب خل كل شى عادي لا تقول انا خفت والشباب عرفو بالعكس خله عادي واللي الرجال فيهم يعيرك ثم توطاه

12- فكر في الاسباب ولا تفكر في النتائج

13-هي واحده من ثنتين يا تخاف وماعاد تطلع والا تتحدى المشكله وتتغلب عليها

14- الدنيا قصيره وراح جميعنا ننطمر بالتراب ولاحد بيذكرنا بعد مئه سنه والاخره ابديه

15-ربنا ما ياخذ شي الا يعطي شي بداله اكتشف هالشى واستفيد منه

16- خربها لكن كن حذر

17- اشغل نفسك دايم ولاتتنح ماعندك شغله لان هذا يضعف النشاط الذهني ويؤدي لتضاعف المشكله

18- تمظهر واكشخ على الناس ماحد على راسه ريشه علشان تحس انك احسن

19-ركز واتبع النصائح اللي موجوده في المقالات الثانيه في هذا القسم

20- لاتجبر نفسك على شي ماتقدر عليه لكن زي ما يقولون حبه حبه لين الله يفرجها

21-قابل الناس بالتدريج يعني ابدأ بالناس اللي تحبهم بعدين بالناس العاديين من الشارع سولف معهم واذا جاتك الحاله جمده وروح ولاحد دري ولاحد شاف لانك ماراح تشوفه مره ثانيه وانس الموضوع ولاتقول انك غلطت وكانك قاتل واحد

22-خذ الامور برواقه وسعة بال

23- كل شي عادي في ناس يسوون مصايب ولا احد يلومهم يعني لاتلوم نفسك

انا من الناس اللي عانو كثير ووالله اني مادخلت عضو الا تقديرا للمشكله اللي يعاني منها الشباب والشابات وعندي مواقف كثيره راح احكيها لكم ياشباب وانا جاهز تحت الخدمه لاي واحد يحتاج مساعده شخصيه يرسل لي خاص وانا راح اسوي اللي اقدر عليه وللحديث بقيه...

اخوكم ومحبكم ومغليكم محمد

السلام عليكم ورحمة الله
اخي محمد اشكرك بأ طيب ما في هذه الدنيا علي جميل الكلام واتمنا من الله ان يشفينا ويشفي كل عليل وانشاء واذا احتجت لك ولنصحك الاقي عندك وقت لي
اخوك (هيمنس )

الله يجزاك كل خير اخوي محمد وانشالله باخذ نصايحك بعين الاعتبار واحاول اطبقها

[السلام عليكم ورحمة الله وبركاته
كل الهلا باخونا محمد وبارك الله بيك ويجازيك عنا كل خير علی مبادرتك الطيبة حتی تعين الشباب بالحصن وسبحان الله ما ادری حسيت من كلامك انه حضرتك حاليا الدنيا ما تسعك من الفرحة والسبب الاول بعلاجك وبفرحتك هو يقينك انه اللی يذكرالله سبحانه فهواكيد راح يذكره ويساعده بس يريد منا العزم والارادة والنية الطيبة والباقی الله يسهله ومشكور اخونا الطيب علی كرم اخلاقك والله يجعلها بميزان حسناتك وباذن الله الكل ياخذ بنصايحك وتفيد الكل ومرة ثانية شكرا الك ونورت حصنا وحصنك
واسفة علی الاطالة

الاخ هيمنس ,,, اشكرك على ردك الجميل والمشجع

وانا حاضر اذا ودك بمشوره او نصيحه لاي شي انا حاضر كل المطلوب انك ترسل على الخاص او على احد المواضيع اللي وضعتها

وتقبل اسمى ايآت الاحترام

من

محبك ومغليك محمد

الاخ الصديق وحيد ماعندي صديق,,,

اشكرك جزيل الشكر على تعقيبك واتمنى من الله سبحانه جل جلاله ان يشفينا جميعا

واللي مطلوب منك المحاوله مره وثانيه وثالثه وصدقني النجاح بيكون حليفك ,,

البدايه بتكون ليلة تفكير عميق وايجابي والمحاوله متى ما اتيحت الفرصه

واتمنى ان تتقبلني صديقا لك

مع خالص الشكر والتقدير

اخوك ومغليك محمد

السلام عليكم ..

يقولون اسأل مجرب .. وعندنا محمد المحبوب مجرب .. وحابب يساعد الاخرين


جزاك الله خير يا اخ محمد

اتمنى من الاخرين الاستفادة من تجاربك وتخبرنا اكثر حتى يستفيد من يعاني من نفس الحالة

تم تثبيت الموضوع ليكون لقاء والكل يستفيد من خبرة بعضنا البعض .

اختكم لمياء

الاخت الفاضله مها احمد ,,

اشكرك جزيل الشكر على استحسانك للموضوع واطرائك عليه ,,وصدقيني والله اني احس بغصه في حلقي لما اشوف الشباب يعانون ولا لاقين علاج ,,,اتمنى لو اني صديق اشجعهم في هالزمن الردي :!:

ارجو منك تقبل المحبه الصادقه والاحترام

من

اخوك محمد

الاخت لمياء

شكرا لتثبيتك الموضوع حيث الان انا ملزم اني ابذل كل الجهد للمساعده اعدك بذلك ,,

تقبلي اسمى ايات الاحترام والتقدير

من

محمد المحبوب

هذه احد المواقف اللي تعرضت لها


قبل التخرج من الجامعه وفي اخر ايام التخرج حيث ان حالة الرهاب عندي تأزمت بشده ولم استطع ان اذهب الى الكليه لاكمل اختبار واحد واتخرج ,,,تخيلو اختبار واحد وسهل مره ما ياخذ نص ساعه واتخرج لكن من شدة تأزم الحاله ما كنت اقدر اطلع من الشقة

حاولت لكن كنت احس بخوف مو طبيعي من الكليه لدرجة اني حفظت الاختبار صم وعارف ومتأكد اني راح انجح فيه لاني بصراحه عارف الاسئله ,,,لكن (يا عظمة الله) كنت اذا وقفت السياره ورحت امشي للكليه احس ان الرهبه عكسيه مع المشي يعني كل ما مشيت اكثر وقربت من غرفة الاختبار احس ان التجمد وزيادة دقات القلب والتصلب في جسمي يزيد!! :P ووالله انا متأكد انه مو خوف من الاختبار لكن خوف من الطلبه اللي يمشون في الاسياب والمدرسين 8)

حاولت الى ان وصلت للغرفه وكان فيها طلبه كثير والاسياب كانت فل من الطلبه المتسكعين ثم ماعاد صرت اشوف شيء ,,,(اغرب شى صار في حياتي) والله ستر ما جا اي مدرس وشافني يمكن سويت شى فيه وانا مدري :) !! لكن لما حسيت ان الوضع ما يأهل قلت بس يابو حميد الفركه وبكره الله ييسرها :!: لا وانا راجع حسيت اني مسوي جريه وكنت ماشي بسرعه واطالع في الارض واحاول امشي في الاسياب اللي مافيها زحمه!!

ولو اني بقدر اخذ الاختبار واسويه في غرفه وحدي بيكون تمام لكن ماكنت اقدر اكلم المدرس لاني لازم اروح للكليه واكلمه ولا اقدر القاه في الليل علشان يكون احسن لقلة الطلبه (الكليه تكون شبه خاليه)

المشكله ان الوضع كان مختلف كنت ادرس في بلد اوروبي وكنت ما ابغى اكلم احد سواء من الاصدقاء العرب او الاوربيين... بدأت باختلاق المشاكل في الحاره اللي كنت ساكن فيها ومن شدة الضغط النفسي ما عد صرت اروح للكليه ابد وصرت اجلس وحدي كثير وبدأت افكر في اعمال مثل الايذاء الجسدي للاخرين علشان اثبت لنفسي اني قوي

طبعا الحاله كانت بدأت معي ايام الثانوي وتشد وتخف بحسب المواقف وطريقة التفكير لكن طبعا بتوفيق الله قدرت اعدي الى مرحلة التخرج وصدقوني ما كانت ايام حلوه ...خمس سنين والحاله بدأت تتدهور من المواقف اللي كانت تصير لي ,,,حتى اخوياء الدراسه صارو يشفقون علي,,, كنت اعرق ويحمر وجهي وبعض الاحيان اتجمد من الخوف ,,,يعني بالعربي كانت من اسوأ ايام حياتي ,,(الله يخلي دعاء الوالده)

بدأت افكر في الفصل وصارو الشباب يتحيرون مني ,,يقولون اشفيه هذا ماعد بقي الا اختبار ويبغى يفصل ,,,

قطعت جميع اصدقائي مو خوف منهم لكن كنت افكر في الاهم ,,,الكليه ,, والتخرج ,,رحت قلت يمكن اصير احسن لو اغير اصدقائي علشان احس ان الجو غير ,,رحت وتعرفت على جميع العوائل اللي في الحاره وصلحت اصدقاء جدد وتقريبا نسيت اني اصلا جاي للدراسه ولكن الله المقدر ,,,

من ناحية الاصدقاء كانو يجوون يوميا للاطمئنان على صحتي لكن انا كنت عدائي للغايه تجاههم وتجاه اي شخص ,,حتى من اصدقائي الجدد اذا جاني وانا في مزاج متعكر..واحاول اتجنبهم لدرجة اني ضربت واحد من الجيران ضرب مبرح بدون سبب وكنت ادور غلطه على اي احد في الشارع علشان ارصه,,,حتى اخوياي صارو يتجنبون يقابلوني في الشارع علشان ما اتمشكل مع احد من الشارع واسوي فيه مشكله ,,,


في شهر واحد تقريبا وانا ما اقدر اروح الكليه واظن اني انسان فاشل واني لازم انتقم من المجتمع اللي حولي بالضرب ,,, صحيح اني كنت اخاف بعض الاحيان وارز في البيت يوم او يومين اعصر مخي اني ما اخاف واني قوي :lol: بدون ما اطلع لكن اول ما احس اني تمام اطلع وادور مشاكل (مقاومه شديده علشان ما يسيطر الرهاب علي)

شهر واحد دخلت في 4 مضاربات على اشياء تافهه بعضها حملت فيه سكين وكنت ناوي اقتل لاني ظنيت اني افشل انسان في حياتي ولاتظنون اني ما كنت خايف الا كنت انتفض وكنت احاول احول طاقة الخوف لطاقه جسديه!!!! وكانت تنجح وبالعكس والله اني كنت احس بقوه وعصبيه عظيمه ما اقدر اسيطر عليها ,,,هذا في الشارع لكن في الكليه كنت اخاف !!

بعدها
بعد فتره بحثت ولقيت ان التوتر يمكن التخلص منه اذا مارست بعض التمارين الروحيه (اليوغا مثلا)

وقلت بدل ما اتعلم فن جديد عندي دين سماوي من ربي ليه ما امارسه ,,,بدأت اصلي كثير واقرأ القران وكنت اخصص وقت طويل من يومي للاسترخاء بالقران والتسبيح ,,,اطلع للغابات وادور لي كهف او اي مكان ما احد يجيه ,,بحيث الطبيعه خلابه للغايه ,,واسبح واستغفر واتأمل في الطبيعه ...كنت تقريبا شبه مخدر من شدة التركيز في الدين وتقريبا تطوعت ,,,اقرأ يوميا سوره البقره ويس ثلاث مرات والمعوذات والكرسي والملك واخر البقره ثلاث مرات ,,, وحسيت بلذه عظيمه في الدين لمدة شهر كامل ,,

بعدها شوي شوي صرت اروح للشباب شوي شوي وكنت ماطيق شوفتهم تحسنت الحاله وقلت لازم ارووح للكليه بكره

وقعدت الليله كامله اقرا قران وادعي اني ما اخاف وكنت اتردد لكن كل ما احس بتردد كنت اقول في نفسي كل هذا اللي قاعد يصير قاعد يصيير في مخك وهو خيال ما يمت للحقيقه بصله ولازم اروح علشان اخلص واني لو رحت من زمان كان تخرجت وكل شي ميسر بذكر الله ,,,

جا الصباح وانا ما نمت وقمت ولبست وقلت الله يعين لكن ما قدرت وصلت للكليه ورجعت يوم شفت زحمه !! :lol:

داومت على الصلاه والذكر وقلت اروح للكليه في الليل واتمشى فيها كل يوم علشان اخذ عليها واتعود !! وصرت اروح كل ليل واتمشى فيها علشان ما كان فيها احد,,, لمدة خمس ايام بتركيز شديد ان كل شي عادي وكنت استغفر لعل الله يشفينا ,,

بعدها قمت الصباح وقلت في نفسي ابد ما يبغالها ,,,اذا احد بس طالع في وجهك عطه كف (اصلا ما حد كان يفكر في او حتى انتبهلي لكن الرهاب وبلاويه)!!

وقلت في نفسي اعتبر انك رايح تضارب احد وقمت اصلي واقرأ قران واستغفر وحسيت اني احسن وانا رايح للكليه

يوم قربت للزحمه حسيت بربكه شديده وكنت اقول في نفسي واتمتم (اللهم صلي على محمد ,,,اللهم صلي على محمد ) قلتها يمكن الف مره وكل ما حسيت بخوف رفعت صوتي بعد ما دخلت للكليه وحسيت ان كل شي عادي وقفت شوي وريحت وقمت بعملية صياغة افكاري من جديد واذكر نفسي انه عادي واني داومت في هالكليه لمدة خمس سنين واللي بيطالع بصفقه !!!

ورحت ودخلت للمدرس وكلمته وانا متنرفز واقول في نفسي كله من وجهك ومن اختبارك ,,,قال وين الطيب قلت حصلت لي ظروف ولاتكثر معي عطني الاختبار لاني مستعجل ,,,,قام خم وعطاني الورقه وخلصته وعديت (100%) بدون اي غلطه !!

وخلصته !! بعدها علطول عالبيت وانا مبسوط وكلمت الاهل وتخرجت

بعد هالمشكله صرت اروح للكليه وانا اتتريق على الطلبه المتسكعين في الاسياب واقطع فيهم !!! :!: وكأن شي ماصار ,,,

هذي القصه طويله لكن اختصرتها كثير واتمنى ان يكون فيه شباب يناقشوني في المشكله ونتباحثها مع بعض للفائده ,,,

والله معكم

بعد التخرج

حفلة التخرج ,,,

في حفلة التخرج حصل لي موقف غريب للغايه ,, بعد ما استلمنا الشهادات من المدير وانتهينا من مراسم تكريم الخريجين الرسميه بدأت انا والشباب بالاحتفال وكان كل شى ماشي تمام ضحك وسوالف ووداع للمدرسين ,,وكنا نقوم بجولات وداعيه مع المدرسين والمدراء في الجامعه والمكتبه والكليه ,,

حصل الموقف لما دخلت المكتبه ,,, كنت انا واحد الاصدقاء ننكت على العمال اللي في المكتبه وعلى طريقتهم في التعامل مع المتأخرين على موعد تسليم الكتب ,,( كانو يعلقون ورقه على لوحه مكتوب عليها اسامي الاشخاص المتأخرين ويكتبون عليها مطلوب للعداله!!!)

وكنا نسولف مع بعض وفجأه جا المدير ومشى في الممر الي كنا (متوزين فيه) وكان معه مجموعه من من الاشخاص المهمين من المعاهد الدراسيه المهتمه والمسؤوله عن وضع الجامعه بصفه عامه ,,,

كلمنا المدير ورحب فينا وعرف اننا متخرجين بحكم لبسنا لزي التخرج ,,

تجمعو علينا وحسيت بظهور عوارض الرهبه (تجمعو علينا في دائره كانهم ناويين علينا )

وبدأ المدير يسألنا عن الكليه هو واللي معه والمشاكل اللي ممكن حصلت لنا ,, انا بديت اتجمد وحسيت ان الدنيا بدت تدور :) ,,,بديت اعرق وارتبكت وحاولت اتمالك نفسي لكن بدون جدوى قلت لهم انا مستعجل بمشي لكن المدير قال لنا ,,لا اذا ممكن نتكلم عن الجامعه علشان نعطي فكره للاشخاص الباقين ,,, المشكله اللي معي كان قد اختير ليكون احد المعيدين في الجامعه وقال للمدير انا بروح اخلص بعض الاوراق في مكتب التسجيل ,,

طبعا محاكيكم وقع في الورطه ,,,ضربته الحاله وما قدر يفكر ,, قلت بس ما يبغالها الا اقول شى واحد ,,اني بروح لدورة المياه وراجع ,,,,

رحت للدوره وخرجت ولكن ماقدرت افرك ,,لانهم بمجرد فتح الباب للدوره تلقاهم واقفين ولافي اي مجال للهروب :cry:

بعد ما غسلت وجهي وقعدت ربع ساعه اهدي من روعي رجعت لهم ,,,وكانو مهتمين في رأيي بصفتي طالب اجنبي ولكن ما عندك احد ,, بدأت اعرق اكثر وماعدت اشوف شي ,,, وسحبت نفسي في نص السالفه وهم يتكلمون معي بدون اي كلمه :)

استغربو وقالو اش فيه هذا ,,مشى بدون مبرر او استئذان,,,

رجعت البيت وانا متنكد وتحطمت وحسيت اني مسوي كارثه من اللي سويته وما قدرت انام ومزاجي كان عكر وحسيت ان كل اللي تصلح خرب وان مافي فائده من هالداء المرضي الخبيث (في رأيي) (وكأني انسحبت من اجتماع خطير لحلف الناتو!!!)

في اليوم الثاني ماقدرت اخرج لاني حسيت ان هالموقف ممكن يصير ثاني ,,,

وقعدت في البيت ثلاث ايام ,,, وبعدها طلعت اتمشى في الظهر وانا مكتئب للغايه وكان في مجموعة اطفال يلعبون كوره في الحديقه وبالغلط شاتو الكوره تجاهي وقمت ورجعتها لهم وقالو لي العب معنا ,,,حسيت ان يوم القيامه قام يوم شفت 200 واحد حولي ,,,,قلت لا ,,اصرو قمت هاوشتهم بيدي ومشيت ,,وجا واحد منهم شكله زي السحليه وشات الكوره على ظهري وواصلت المشي بدون اي رد!!

طبعا عالطول عالبيت وما صرت اخرج منه لمدة شهر بس للبقاله ,,,,

للقصه بقيه اذا كان فيه تجاوب !!

اخوكم محمد

لازلت لااحصل على اي تجاوب ,,, :o

على كل حال ,, :D

احب اطلب من الشباب والشابات المصابين بالرهاب عدم الاستسلام و ان شاء الله سوف يتغلبون على هذه المشكله ,,

اعتبر ما تعانيه فتره مرحليه من حياتك ولا تصعب الامر بل بالعكس يجب ان تسهل الامور لان ما يحصل لك الان مجرد عارض مرضي في غالب الاحيان يكون قابل للعلاج ,,

وكان بودي ان اكمل لكم بعض القصص والهدف منها المناقشه الجماعيه بين جميع الشباب والشابات المصابين بهذا الداء وهذه احدى الاساليب التي تعالج بها هذه الحاله ,, كم كنت اتمنى ان يشاركني الاخوه والاخوات ببعض القصص حتى نتدارسها ونحاول علاجها بطريقه جريئه وغير متحرجه او خجوله ,,

الحمد لله بعد معاناه طويله استطعت ان اتخلص او اسيطر على المشكله بالعزم الصادق وبعدم الاستسلام وانا الان متزوج ورزقني الله بطفلين واعيش حياه زوجيه وعائليه سعيده وكل ذلك بفضل الله
واستطعت بفضل من الله ثم من دعاء الوالدين ان احضر للسفر خارجا مع عائلتي لاكمال شهادة الماجستير من ثم الدكتوراه -اذا اراد الله- وسوف يكون ذلك بعد اشهر قليله ان شاء الله بعد ان كنت في يوما من الايام ارغب بالانتحار ووضع حد لحياتي ,,

خذ وقتك للعلاج وافعل المستحيل ولاتجعل هذا المرض يقف عقبه في حياتك ,,

اخوتي واخواتي يجب عليكم التحرك وان لاتقفوا ساكنين مكتوفي الايدي ,,



ان هذا الداء لا يزول الا بالممارسه والتركيز المستمر واهم من ذلك اتباع النصائح التى تفضل بها الاخوه من الذين اشفاهم الله من هذا المرض او ببعض ارشادات الاطباء المضافه ايضا.

اعرف بعض الاخوه الذين اصيبو بهذا المرض وقد شفوا منه كليا وتدريجيا وهم الان منغمسون في حياتهم ,,,كل ذلك لانهم لم يستسلموا يوما ..

لنعقد العزيمه معا ولا نستسلم,,

واجدد رغبتي بمساعدة اي محتاج من الاخوه او الاخوات من المصابين بهذا الداء وانا حاضر لهم باي نصيحه لاي مشكله تواجههم متى استطعت ذلك,

والله الشافي ومنه التوفيق

:P :P :P :P :P
جزاك اللة خيرا على هادي النصايح


الى الامام

اخي الفاضل

صحيح مافي تفاعل بس شوف عدد المطلعين على الموضوع والقارئين لها 363 ما شاء الله

اكيد في ناس تستفيد من تجربتك وكلامك

الله يعطيك العافية

اختك لمياء

جزاك الله خيرا :roll: :roll:

أخي محمد موضوعك هذا من أهم أسباب

تسجيلي للمنتدى :)

فأنا كنت قارئة فقط لموضوعك وتجربتك

واستفدت منك الكثير

فأكمل لنا ولا تبخل علينا

مادام هذا الي تعرضت له وصبرت الى إن نجحت شي غريب وعجيب ولكن ليس بالمستحيل وأرجو من الله أن يخلصنا من هذا الي نحن فيه كلامك هذا ريحني وبدا يجدد لي الأمل والعزم والأرادة القويه على التغلب على هذه المخاوف وارجو من الله التوفيق لي ولك وللجميع بأذن الله

عاد كذا بحاول بشيل فكرة كانت في راسي وتروداني لأني حسيت إني بنتهي او انتهيت
وإن مافي أمل ولكن كلامك وكتابتك أوقفتني وارجو من الله التوفيق والسداد للجميع

السلام عليكم ورحمة الله وبركاته

هذه اول مشاركة لي وبصراحة شدني هذا الموضوع وحبيت اشارك فيه

انا قرات المشاكل والقصص التي ذكرتموها ولقيت بعض الاشياء موجودة عندي وبعضها لا ولهذا لا استطيع ان احكم هل اللذي عندي هو رهاب اجتماعي ام انه شيء اخر

حالتي انا مااقدر اوصفها بشكل دقيق لكن سوف اذكر مواقف وحالات معينة ومختلفة ممكن توضح الحالة بشكل عام .... ولن اكتب بشكل مرتب ولكن سأذكر اي شيء يخطر بالي وقت الكتابة

انا قرأت واحد من المشاركين يقول انه يخاف ويرتبك اذا كان المكان مزدحم لكن بالنسبة لي انا بالعكس اذا كان المكان مزدحم احس بنوع من الارتياح والمشكلة انه اذا كان فيه عدد قليل لاني احس ان التركيز كله علي واحس ان شكلي غريب والناس تنظر وهذا يسبب لي الارتباك

اذا شفت محل مزحوم بالناس ومحل فاضي اذهب للمزحوم لاني اشعر انه لا احد يهتم بالنظر لاحد وسط الزحام

اذا كنت مظطر اروح لشخص في مكتب افضل انه يكون لوحده ولو رأيت عنده مجموعة اصدقاء مستحييييييل ادخل وارجع مرة ثانية

الكلام مع شخص واحد سهل لكن اجد صعوبة في الكلام معه مع وجود شخص اخر ... مع اني ممكن اتكلم مع هذا الشخص الاخر بسهولة لو كان لوحده !!!!!!! ليش ماأدري ؟؟؟!!!

مع اني متعلم ومثقف واجيد اللغة الانجليزية لكن احس ان هذا بدون فايدة لأني لا استطيع الكلام بطلاقة حتى بالعربي ودائما ارتبك وافكر في الكلام الذي يجب ان اقوله واي واحد يشوفني يعتقد اني لا اعرف شيء وهذا يسبب مشكلة عند المقابلة الشخصية عندما اتقدم لعمل ... واكثر من فشلت في الحصول على عمل لاني لم استطيع ان اقنعهم بما عندي ... ببساطة اشعر امامهم اني شخص اخر لا اعرف شيء وهذا يعطيهم انطباع خاطيء عني .... مع اني بيني وبين نفسي عارف اني افضل من الشخص الذي يجري معي الاختبار لكن ماقدر اعبر عن نفسي كما هو الواقع

مشكلتي بدأت وانا في الابتدائي لأني كنت منطوي تماما في المدرسة فقط ومع هذا كنت متفوق ومع مرور الوقت تعود الجميع علي وانا بهذا الشكل وحبيت اغير نفسي لكن كل مرة افكر في انهم خلاص تعودوا علي كما انا لو تصرفت بطبيعتي سوف يستغربون من ولن يتقبلوا ذلك
وكان عندي احساس اني اقدر اكون طبيعي لكن لو غيرت المكان والناس الذين حولي يعني ناس لا يعرفوني حتى ابدأ بشكل طبيعي من البداية

المهم حالتي تحسنت بعد مانهيت المرحلة الثانوية وكانت تتحسن مع مرور الوقت ... لكن بشكل عام ماتغير شي ملحوظ .. تغير الانطواء ولكن الشعور بالقلق والارتباك والخجل لم يتغير ... فانا لا اشعر بنفسي كما انا عندما اكون مع الاخرين يمكن 50% فقط لأني اكون متحفظ واحسب كل كلمة وحركة ولذلك انا افضل ان اكون لوحدي لأني اجد راحتي وامارس كل شخصيتي بدون تحفظات

واكره شي عندي هو اني اكون في مجموعة ليس رهاب وخوف ولكن لأني ماقدر اكون كما انا ... يعني لا استطيع ان اتصرف بحرية كاملة ... لماذا لا ادري ؟؟!!!!!! يعني انا احب المزح وشخصيتي الحقيقية مرحة مع اهلي لكن عندما اكون مع ناس اخرين لا استطيع اظهار هذه الشخصية وهذا اللي يخليني احس اني واحد ثاني ولذلك افضل عدم قضاء وقت اطول مع الاخرين

اصعب موقف عني هو عندما ادخل على شخص وتكون المسافة بينه وبين الباب طويلة اشعر ان الوقت يمر ببطء وارتباك واحاول عدم النظر اليه مباشرة
وعندما امشي في الشارع ويكون مجموعة اشخاص جالسين .. لا ارتاح الا اذا تجاوزتهم
احاول ان لا انظر الى وجوه الناس في الشارع لاني اشعر انهم مركزين النظر علي وان شكلي غريب

السبب في هذا هو انه عندي بعض التشوهات .. تشوه في الكتفين تقوس مع عدم توازن .. بالاضافة الى عدم توازن اثناء المشي مع عرج بسيط ولكنه مؤثر ... وهذا الذي يزيد المشكلة تعقيد لانها ليست نفسية فقط وحتى لو حاولت ادرب نفسي على مواجهة الاخرين يبقى الشكل مؤثر ويضعف في ثقتي بنفسي

احيانا ادفع نفسي وترتفع معنوياتي ولكن بمجرد اني اشوف شخص ينظر لي باستغراب تهبط حالتي المعنوية الى الصفر واشعر باحباط واكتئاب شديد وحزن وعصبية واقضي الامر الذي خرجت له واعود بسرعة الى البيت وانا ي حالة اكره فيها نفسي وكل شيء

ولذلك لا افضل الخروج كثيرا واذا خرجت اتحاشى النظر الى الاخرين حتى لا ارى ردة فعلهم وحتى لا تصيبني حالة الاحباط والاكتئاب مرة اخرى ... صحيح اني لا اطون سعيد ولكن اهون بكثير من ارى شخص ينظر لي بسخرية او باستغراب ....

انا الان تركت العمل لأني مليت وطفشت وكرهت كل اللي في العمل لأنهم دائما اذا حصلت مشكلة بسيطة بيني وبين احد فأول شيء يقوم به هو السخرية وتقليد طريقتي في المشي طبعا هو يدعي انه يمزح ولكن بالنسبة هذا يعتبر مسالة كبيرة جدا وبهذا السبب كثرت المشاكل مع جميع من العمل

طبعا انا مازعلت لترك العمل لاني ارتحت نفسيا قليلا واصلا لم اكن سعيد فيه فما هي فائدة العمل والمال اذا كان الواحد غير مرتاح مع نفسه

طبعا انا حاولت اني استغل هذا في تقوية شخصيتي لكن المشكلة هي اني بيني وبين نفسي عارف اني فعلا كذلك ... لاني انا اصلا اكره هذا الشكل واتمنى ان انام واصحى واجد جسمي سليم .... واحساسي الان هو ان هذا هو الحل الوحيد لو انحلت هذه العيوب لانحلت كل المشاكل

واخر المواقف والحالات هو اني احيانا اتهيب من الذهاب لانهاء عمل ما في ادراة حكومية مثلا ولكن بعد ان اضغط على نفسي اتمكن من ذلك وبعده اشعر براحة واشعر بإن كل شيء سهل لكن بعد مرور كم يوم تقل هذا الشحنة النفسية والمعنوية بالتدريج وترجع حالة الخوف والقلق والارتباك والتردد

باختصار انا اشعر بان شخصيتي ضعيفة جدا وحساسة امام الاخرين مع اني اعرف اني افضل منهم علميا وذهنيا وثقافيا

ونسيت اقول شيء اخر وهو اني كنت في المدرسة والى الان شخص ذكي جدا ودرحة ذكائي عالية جدا والحمد لله

واطرف المواقف التي لا يمكن احد يصدقها كانت حالتي في المدرسة سيئة جدا ... وكنت اخاف من الظهور امام الطلاب والمدرسين ولذلك كنت اتعمد اني اترك بعض الاسئلة بدون حل حتى لا أكون من الثلاثة الاوائل .. مع اني اعرف جميع الاجابات وبأمكاني الحصول على الدرجة الكاملة في كل المواد

ايضا احب ان اقول ان شكلي كان سليم عندما كنت صغير ولم يكن هناك مشكلة .. لكن مع هذا كنت انطوائي وخجول جدا .. وعندما كبرت بدات اتخلص من الخجل تدريجيا لكن ظهرت التشوهات مع بداية سن البلوغ وحصلت لي انتكاسة ... انا متأكد ان الحالة الحالية ليس لها علاقة بالتي كانت في الصغر او يمكن لا .. بصراحة لا ادري ؟؟؟!!!!

في النهاية انا حبيت اشرح اكثر من موقف واكثر من حالة حتى اشرح حالتي واعطي فكرة عنها واريد ان اعرف هل هذه رهاب اجتماعي ام شيء اخر ؟
وماهي الطريقة للتخلص منه ؟
وهل يوجد احد مر بمثل هذه الحالة ؟
وهل يوجد تصنيف لهذه الحالة في علم النفس ؟؟

محمد احمد ربك تخرجت وعدت على خير
انا تركت الجامعة وانهارت احلامي مع اني ذكي جدا ومن الاوائل دائما ولا اجد اي صعوبة في الدراسة....لكن صار مالم يكن في الحسبان

بس بصراحة حلوة حركتك اللي تركتهم واقفين ولا عبرتهم ههههههههههههههههههههه
انا بعد كنت اضرب برغبات الدكاترة عرض الحائط واقوم من نص المحاضرة واطلع عيني عينك وبدون استئذان والمصيبة هالشعور العدواني ما يكون الا بعد ما اجاوب على سؤال ودائما اجابتي على سؤال الدكتور صح مية بالمية ويبدا الدكتور بالاشادة فيني....وفجأة وبدون سابق انذار وبينما الدكتور يشيد فيني اطلع....هيــــــــه وين رايح...واطالع فيه بنص عين ولا كأني اشوف احد قدامي وافتح الباب بكل قوة واصكه في وجههم ....ويبدأ تعذيب الذات ..
والحمد لله كل شي بالرغم من اني تركت الجامعة وانهارت احلامي مثل ما قلت
:roll: