عضوه جديده.. تطلب المشوره..

[الرحيل]

السلام عليكم ورحمة الله..

حبيت اسجل بهالمنتدى اللي أعرفه من أكثر من سنتين.. وكنت اكتفي بالقراءة.. بس الحين ودي آخذ مشورتكم في موضوع يهمني..

انا مالجه من سنه تقريبا (عقد قران) وما بقى على الزواج إلا شهر وشوي..

ويوم اتقدملي زوجي كنت مشترطه الدين والاخلاق للقبول.. وكنت أأكد على نقطة عدم التدخين.. وبعد البحث والسؤال قالولي انه ترك التدخين من سنتين وهو أكد للوالد هالشي..

المهم.. من شهر تقريبا ركب وياه السياره اخوي الصغير.. ووصله زوجي لباب البيت عشان ياخذ غرض ويرجع.. ويوم رجع اخوي لقى ريحة السياره كلها دخان وزوجي فاتح باب السيارة.. ويقول انه الريال ارتبك وطلع علك وأكل..

المهم قلت لأخوي متأكد من كلامك.. وحلفلي.. وقلت معقوله في هالدقايق القصيره يكون دخن! فقال انها ريحة مدواخ مب سجاره.. وان المدواخ عباره عن شفطه وحده او ثنتين وخلاص! وانها تعادل أكثر من سجاره!! انا بصراحه ما أفهم بهالأمور.. بس هالكلام وايد صدمني..

أنا وايد أثق فيه وأحترمه وبصراحه ما شفت منه هالفتره إلا كل خير.. ما توقعت إنه كذب علي أو على اهلي يوم تقدم..

أنا بصراحه أكره التدخين والمدخنين.. وعندي مبدأ يقول ان المدخن ما ينفع زوج لأنه مب قادر يهتم بعمره وصحته كيف بيهتم بحرمه وعيال!! :cry:

ماعرف شسوي!! مره وهو يكلمني قعد عنده واحد يدخن قام عصب وسب الريال وقال التدخين وساخه وريحتها خايسه.. وأحسه كان يتكلم بصدق.. فاستحيت أفاتحه بالموضوع واسأله إن كان يدخن أو لا.. :(

يمكن تقولون اني مكبره الموضوع ووايد شباب غيره يدخنون وممكن يهتدي.. بس أنا اللي مزعلني أكثر من سالفة التدخين هو كذبه علينا..

أتمنى من اللي عندهم خبره بهالموضوع.. أو بعلم النفس ان يشيرون علي بأفضل طريقه للتصرف.. وكيف اخليه يقول الصراحه.. ترا ما بقى شي عالعرس.. وأنا بصراحه أحب شخصه.. بس ما أحب تصرفه هذا.. ومب عارفه شسوي..

اسمحولي ان كان مكان الموضوع غلط.. انا ما عرفت احطه اهني او في قسم التدخين!...

[شا مل]

لا العفـــو أخت رحيل .. تم أبلاغ المختصين ..

.. وستتحسن الأمـور بأذن الله ..

. شا مل

[وردية الفرح]

الرحيل العزيزه...
اهلا بك اختا كريمة في منتدانا..الذي نحاول فيه..
نشر الفائده ((للجميع)) في جميع المجالات.. ونبارك لك
في حايتك الجديده..واتمنى..ان يوفقك المولى ويرزقك الذريه.الصالحه.. اخيه انّ ما اعتبرتيه مشكله وحيّرتك
..ما هي الآحالة تستطيعين تغييرها والتمس في شخصيتك القدرة على ذلك .(( التدخيين)) آفة ونسأل الله
ان يشفي من ابتلي بها..ولكن لآ تجعليها سببا ..في تشكيكك في صدق زوجك واذا كنت تعلمين انه يتمتع
بصفات جيده ومتمسك بدينه مؤدي لفرائضه فلا تناقشي
الموضوع معه مباشرة ولكن حاولي.. ان تتطرقي للموضوع..بطريقة مناسبه... وستتمكنين من معرفة الحقيقه..وهناك كثير من الزوجات الصالحات استطعن..التأثير على ازواجهن للتخلّص من بعض العادات السيئه....وحثّهم على طريق الخير....وفقك الله

[خلود الشريف]

صباح الخير عزيزتي الرحيل 0

اولا اشكرك اخي الشامل على جهودك0

عزيزتي الرحيل زواج مبارك باذن الله ودعواتي الصادقه ان تهنئي بزوجك ويهنئ بك وان يرزقكم الذرية الصالحه ويزيدكم من فضله0

غاليتي انا مع اختي وردية الفرح في كل ماذكرته وأود أن اضيف شي بسيط وذلك من بعد اذنك اختي وردية الفرح 0

عادة مايصعب على المدخن ترك التدخين ولا تعتقدي انه امر سهل لا والله فان المدخن يعاني كثيرا حتى يتمكن من طرد النوكويتين الموجود بجسده وحتى بعد ان يتمكن من تركه الا ان نفسه قد ترغب بالعوده مره اخرى ولو شفطه واحده لذلك يحتاج في هذا الوقت الى الدعم ممن حوله 0واعتقد ان ماقام به زوجك في ذلك اليوم مجرد رغبة ألحت عليه واطاعها ولم ينوي خداعكم 0

عزيزتي قدمي دائما النوايا الطيبه حتى تسير السفينه بأمان 0


مرة اخرى اتمنى لكما من كل قلبي حياة سعيده هادئه 0